“Bir əsrə sığmayan ömür”
Bir neçə saatdır ki, ən gözəl yazan qələmimlə bəmbəyaz bir vərəqi yazı masama qoyub düşünürəm. Bu yazıya başlamadan öncə ağlımda dönüb-dolaşan və məni xeyli vaxtdır ki, narahat edən sualıma cavab tapmağa çalışıram:"Axı bir əsrə sığmayan həyatı bir neçə vərəqə necə sığdıra bilərəm?"
Bu gün keçmişə nəzər salıb, bu günü təhlil edib, gələcək üçün yaradılan
imkanları görməyə çalışacağam. Çünki haqqında yazacağım insan dünənin, bu günün
və sabahın lideridir. Bu gün qələmim kiçikdən böyüyə hər kəsin qəlbində əbədi
yaşayan, Azərbaycanın inkişafı naminə misilsiz xidmətlər göstərən, dünya
liderlərinin imzaları içində imzası olan ümummilli lider Heydər Əliyevdən
yazacaq.
Mənim "Heydər baba" sevgim kiçik yaşlarımdan yaranıb. Kitablarda,
qəzetlərdə, televiziyada, ya da yolda gedərkən şəklini gördüyüm an gözümdəki
sevinc işığı, üzümdəki həyəcan və təbəssüm ona olan uşaqlıq səmimiyyətimin
yansıması idi. O, nəinki mənim, bütün uşaqların Heydər babası olub, sadə,
təvazökar, xalqını sevən Heydər babamız...
Böyüdüm, mən böyüdükcə, Ulu Öndərin tərəqqi naminə fəaliyyətini daha dərindən
anladıqca qəlbimdəki sevgi də böyüdü. Bu gün burada təkcə mənim deyil,
ümumilikdə Azərbaycan xalqının qəlbindəki əbədi sevgi və hörmətdən bəhs
edəcəyəm. Bu səbəblə gəlin yaxın keçmişə qısa nəzər salaq.
Bir əsrə sığmayan ömür... Elə bir ömür ki, biz bu gün də onun uğurlu
nəticələrini görür, təməli sağlam qoyulan inkişaf yolunda dayanmadan
irəliləyirik. Əminliklə demək olar ki, Azərbaycanın ən yeni tarixinin bütöv bir
dövrü ümummilli liderimiz Heydər Əliyevin şərəfli adı və möhtəşəm fəaliyyəti
ilə bağlıdır.
1988-1993-cü illərdə cəbhədəki məğlubiyyətlər, Azərbaycanın ictimai-siyasi
həyatında çaxnaşmalar kimi bir sıra səbəblərlə ölkədə gərginlik hökm sürürdü.
Azərbaycanın göy üzünü mənfur qara buludların örtdüyü belə bir məqamda xalqın
xilaskarı Ulu Öndər Heydər Əliyev oldu.
Heydər Əliyevin zəngin dövlətçilik təcrübəsi, möhkəm iradəsi və uzaqgörənliyi
sayəsində respublikamızda ictimai-siyasi sabitlik və iqtisadi dirçəliş təmin
edildi. Siyasi aləmdə dövlətimizin beynəlxalq nüfuzu möhkəmləndi və
müstəqilliyimiz dönməz xarakter aldı.
Uzun illərin təcrübəsi sübut edir ki, yalnız güclü siyasi lider yetişdirən
xalqlar öz milli sərvətlərinə sahib olmaq imkanı qazanırlar. Ulu öndər Heydər
Əliyevin gərgin əməyinin uğurlu nəticəsi bu gün Azərbaycanda hər sahədə özünü
sübuta yetirir. O, bu gün Azərbaycan xalqının dünyada sülhsevər bir xalq kimi
tanınmasına səbəb olmuş, respublikamızın müstəqilliyinin qorunub saxlanmasına,
dinc quruculuq işlərinin aparılmasına, iqtisadiyyatımızın möhkəmləndirilməsinə
tarixi bir imkan yaratmışdır.
Ulu Öndərin dərin məntiqli nitqi, natiqlik məharəti, söz seçmək bacarığı,
auditoriya ilə ünsiyyət qurmaq səriştəsi onu dinləyən hər bir kəsə məlumdur. Heydər
Əliyevin ən güclü silahlarından biri söz idi. Xalq ona inanır, güvənir və
arxalanırdı. Çünki onun xüsusi natiqlik məharəti ilə etdiyi çıxışlar və
səsləndirdiyi fikirlər xalqın yaddaşına yazılmış, ümid işığı olmuş və bu gün də
dillər əzbərinə çevrilmişdir.
Heydər Əliyevin Azərbaycan gəncliyinə böyük ümidləri vardı və hər zaman öz
çıxışlarında qeyd edirdi ki, Azərbaycanın gələcəyi gənclərin əlindədir. Bu gün
gənclərə göstərilən diqqət və dəstək Ümummilli Lider Heydər Əliyev kursunun, o
cümlədən Prezident İlham Əliyev siyasətinin təntənəsidir.
Biz Heydər Əliyev siyasi kursunun layiqli davamçısı İlham Əliyevin rəhbərliyi
altında məhz onun rəhbərliyi dövründə yetişən və Qarabağ vəsiyyətini yerinə
yetirən xalqın nümayəndələriyik. Biz doğma yurdumuz Azərbaycanı beynəlxalq
aləmdə layiqincə təmsil edib dünyaya tanıdan gəncliyin fərdləriyik. Biz
Azərbaycanın gələcəyiyik. Bu gün hər bir gənc sabahın ailə başçıları, gənc
anaları və atalarıdır. Azərbaycan gəncliyi öz strateji yolunu, azərbaycançılıq
məfkurəsini, milli-mənəvi dəyərlərini məhz Heydər Əliyevdən öyrənərək, onun
həyat və yaradıcılığını öz ailə modelinə tətbiq edərək inkişaf etməlidir.
yazar
Xədicə Hümbətli